'S e Siabost as Bòidhche Leam

'S e Siabost as bòidhche
Far 'n do thogadh òg mi suas,
Far bheil na cruachan mònadh
'S na beanntan mòr mun cuairt;
Na h-eòin bheaga 's ceòl aca
Air mòinteach seinn an duan:
Bidh 'n uiseag is an smeòrach ann
'S gum b' eòlach mis' orr' uair.

Tha gàrraidhean is buailidhean
Tha sluagh nach eil an-diugh beò
A-nis nan tulaich uaine
Air an cuartachadh le feòir;
Gu iomall na craoibh uaine
Bidh 'm buachaill' ri crodh mòr
Measg ghillean agus ghruagaichean
An uair a bha mi òg.

'S e chuimhne 's òig' a th' agam
Air Leòdhas bhith làn sprèidh;
Air buachailleachd a b' eòlach mi
Làn sòlais bha mo cheum,
Am measg nan gruagach bhòidheach
Le òran aig gach tè,
'S na banchaig dol gu mòintich ann,
Gum b' aighearach an ceum.

Chì thu 'n crodh cho sgiamhach ann
A' biathadh nan laogh òg
Air àirighean gan riarachadh
Measg lèanaich 's canach mòr;
Na caoraich 's iad cho sgiamhach ann
Air lèanaidh 'g ith' an fheòir,
O chiall, na h-uain a' mialaich ann,
Gur brèagha leam an ceòl.

'S e Siabost as bòidhche
Far 'n do thogadh òg mi suas,
Far bheil na cruachan mònadh
'S na beanntan mòr mun cuairt;
Na h-eòin bheaga 's ceòl aca
Air mòintich seinn an duan:
Bidh 'n uiseag is an smeòrach ann
'S gum b' eòlach mis' orr' uair.