Na Lochlannaich gan tiodhlacadh ann am Fùideigh

Calum MacIllEathain (CM): Agus an cuala sibh sìon a sheann naidheachdan aig na seann daoine mu bana-phrionnsaichean Lochlannach agus prionnsaichean Lochlannach, iad a bhith air an tiodhlacadh an àitichean sam bith thall no a-bhos an seo feadh na h-eileanan?

Dòmhnall MacAonghais (DM): Tha. Ò nach eile ann am Fùideigh ann a shiud, tha fhios agaibh, air an tiodhlacadh, na Lochlannaich. Chì sibh ann an geamhraidhean na cnàmhan aca a' tighinn a-mach ann an ceann an iar Fhùideigh mu choinneamh Eòlaigearraidh à aodann nam botaichean. 'S na cnotagan chlach, tha fhios agaibh, anns am biodh iad a' pronnadh a' ghràin, chì sibh iad a' tighinn a-mach fhathast ann a shin nam biodh gèile a ghaoth an iar ann. Sin agaibh dìreach far an robh na daoine. Sin far an robhar a' tiodhlacadh nan daoine, ann an ceann an iar an eilein bhrèagha a th' ann a shin, mu choinneamh Eòlaigearraidh ann am Barraigh. 'S ann. 'S ann, 's ann. Tha na claidh ann a shin. Ach, tha fhios agaibh, bha de dh'fhàgail aig an Norwegian, 's bha e riamh aig an fheadhainn a bh' air feadh nan eileanan a tuath, bha iad a' toirt nan corp leotha a Norway, ach an gearastan a bha seo. Bha. Bha siud na ghearastan aca, 's ghlèidh iad an stronghold a bha siud, tha fhios agaibh, gus an do [???] na droch dhaoine à deas air an [???] iad.