Rannsaich

Prògram Choinnich

Ceann-latha 27 August 1997
Àireamh a’ chlàir 10477
Pàirt 1

fiosrachadh a' chlàraidh

Àireamh an Teip Thùsail

Program Choinnich 27.08.1997

Geàrr-chunntas

Tuairisgeul air Oisean.

Tha an t-Ollamh Dòmhnall Meek a' toirt tuairisgeul air Oisean agus an t-àite a th' aige ann an dualchas nan Gàidheal. Tha e a' bruidhinn air na diofar phearsantachdan a bha aige: na shealgair, na sgeulaiche, na bhàrd, na shàr ghaisgeach, agus mar a dh'atharraich iad seo rè nan linntean.

Àite Clàraidh

Siorrachd - Ros is Cromba

Paraiste - Steòrnabhagh

Eilean - Leòdhas

Baile/Àite - Steòrnabhagh

Cànan

Gàidhlig

Seòrsa

Rèidio

Cruinneachadh

BBC

Tar-sgrìobhadh

Coinneach MacÌomhair (CM): A bheil cuimhne agaibh an t-seachdain a chaidh, rinn sinn còmhradh agus beagan fealla-dhà dhen a' bheachd mullach Beinn Chruachain ann an Earra-Ghàidheal a bhith air a cruth atharrachadh gu bhith ann an ìomhaigh an t-seann churaidh Èireannach, Oisean? Chleachd sinne an t-ainm Oisean grunnan thurais, agus aig an àm thuirt sinn gur ann a dh'fheumamaid tilleadh gus beagan fhaighinn a-mach mun laoch a bha seo, a bha na bhàrd cuideachd. Uill, tha an t-Ollamh Dòmhnall Meek à Oilthigh Obar Dheathain còmhla rium an-diugh gus beagan innse dhuinn mu dheidhinn. An toiseach, a Dhòmhnaill, an t-ainm fhèin - Oisín, agus chan e Oisean, anns na seann aimsirean. A bheil sin ceart?

Dòmhnall Meek (DM): Tha. Anns an t-seann Ghàidhlig Èireannach 's e Oisín a theireadh iad, le i fada air deireadh an fhacail, agus ann an Gàidhlig na h-Alba, 's e Oisean a theireamaid. Ach ann an Èirinn gus an latha an-diugh 's e Oisín a their iad, agus bidh sinne ag ràdh Oisean.

CM: An toiseach, an robh a leithid a dhuine ri Oisín ann?

DM: Nuair a tha duine a' beachdachadh air a' cheist a tha sin, a Choinnich, feumaidh e chuimhneachadh gun robh dà shaoghal, mar gum b' eadh, ann, agus gu bheil sinn eadar dà shaoghal - saoghal seann diadhachd agus an saoghal a bha ann an ceart da-rìribh, agus tha Oisean agus athair, Fionn mac Cumhail, a' seasamh eadar an dà shaoghal a tha sin. Tha ceangal aig Oisean mar sheann ghaisgeach ri saoghal nan seann diadhan, agus tha cuideachd ceangal aige ri saoghal athar, 's e sin Fionn mac Cumhail. Agus a' cheist, an robh iad riamh ann, ceist dhuilich a tha sin. Ann an seagh, 's dòcha nach robh. Ach bha daoine a' smaointeachadh gun robh Oisean ann, agus an dealbh a tha againn air anns an t-seann litreachas, 's e dealbh air duine a bh' ann an ceart da-rìribh, mar shealgair an toiseach, sealgair anns an Fhèinn, còmhla ri athair, Fionn mac Cumhail. Agus shaoileadh tu, nam biodh tu a' leughadh an t-seann litreachais, gun robh e ann an ceart da-rìribh, agus 's e sin an dealbh a tha air a bhith air gu ìre chun an latha an-diugh fhèin, eadhon anns a' Ghàidhealtachd.

CM: Bha sinn a' bruidhinn air Oisean, curaidh mòr, gaisgeach cogaidh, bàrd cuideachd. An e dìreach... an e dealbh a tha sin dhen an àm a bh' ann, no dè?

DM: 'S e dealbh a th' ann den phersona aig Oisean fhèin, agus bha sin ag atharrachadh sìos tro na linntean. Mar a thuirt mi, aig toiseach gnothaich 's e sealgair a bh' ann còmhla ri athair, sealgair feadh na dùthcha ann an Èirinn, agus a' dìon na dùthcha, còmhla ri buidheann de dh'òganaich eile ris an canadh iad an Fhèinn, no an Fhiann. An uair sin, aig toiseach nam meadhan-aoisean, anns an dàrna linn deug, dh'atharraich am persona aig Oisean còir, agus bha daoine a' beachdachadh air mar sgeulaiche. Anns an dàrna linn deug chaidh cruinneachadh mòr de sgeulachdan a dhèanamh ris an abrar Agallamh na Seanórach. 'S e sin còmhradh nam bodach. Agus anns a' chòmhradh a bha sin, bha Oisean agus gaisgich eile bhon Fhèinn ag innse sgeulachdan don Naomh Pàdraig, agus bha iad ag innse dha mu na seann làithean, nuair a bha an Fhèinn làidir air gach cnoc, 's nuair a bhiodh iad a' sealg 's a' siubhal air feadh Èireann 's air feadh Alba cuideachd. Agus mar sin, bha persona an sgeulaiche ceangailte ri Oisean còir. Ach cuideachd, bha e air a dhealbh mar bhàrd, agus bha sin anns na... anns na meadhan-aoisean cuideachd, ach eadar an dàrna linn deug agus an t-siathamh linn deug, agus bha daoine a' coimhead air mar bhàrd, agus bhiodh bàird a' dèanamh dàin ghaisgeil mun Fhèinn o shean, agus bhiodh iad a' fàgail nan dàn sin air Oisean, ag ràdh gur e Oisean a rinn iad. Agus mar sin, bha diofar phearsantachdan, mar gum b' eadh, aig Oisean. Bha e na shealgair, bha e na sgeulaiche, 's bha e na bhàrd.

CM: Duine a' dèanamh a dhealbh fhèin dheth?

DM: Gu ìre mhath. Ach cuideachd, bha e a' riochdachadh dòigh-beatha a bh' ann bho shean, dòigh-beatha a bu mhiann le daoine a bhith a' dol air ais thuice, dòigh-beatha anns an robh sealgaireachd 's sunnd 's aoibh air feadh na dùthcha, agus gaisgich òga, an Fhèinn, a' cur seachad lathaichean tràtha am beatha ri rudan a bha a' còrdadh riutha. Agus mu dheireadh thall, rinn daoine dealbh air Oisean mar sheann bhàrd dall, a bha a' coimhead air ais air na lathaichean a dh'aom, 's a' caoidh 's ag ionndrainn a chàirdean. Agus cuideachd, bha iad ga dhealbh mar dhuine a bha mu dheireadh fo smachd aig Pàdraig, aig an Naomh Pàdraig, agus eadhon a' togail eaglais dha thall ann an àite ris an canar Ail Finn ann an Èirinn, agus ann an sin nuair a bhiodh na clachan cho trom 's a bhiodh an latha cho teth 's a h-uile nì cho duilich, bhiodh Oisean còir a' smaointeachadh air na lathaichean a dh'fhalbh agus a' dèanamh dhàn, agus ag ràdh mar seo:

Is fada a-nochd an Ail Finn
Fada rinn an oidhche a-raoir
An latha an-diugh gur fada dhomh
Gum bu leòr fad an latha an-dè

Fada leam gach latha a thig
Cha b' ann mar sin a chleachdadh linn
Mu bhith an eugmhais na Fèinn
Do chuir sin mo chiall air chùl

Chuir sin mo chiall air chùl, 's e sin ri ràdh gu bheil e dìreach a' dol às a rian às aonais na seann chàirdean.

CM: Na sgeulachdan ann an seo, ann an cumadh bàrdachd, air a sgrìobhadh, man a tha thu ag ràdh, anns na meadhan-aoisean, ach a' coimhead air ais gu amannan tòrr nas fhaide air ais na sin, nuair a bha daoine a' creidse gu mòr ann an rudan mar uilebheistean, ainmhidhean a bha a' tighinn às na speuran, a' geasachd agus rudan dhen t-seòrsa sin, nach eil?

DM: Tha sin ceart. Aig an àm a bha sin, bha daoine a' coimhead air ais gu na linntean tràtha mar gum b' eadh àm anns an robh na h-uilebheistean a bha sin a' coiseachd air feadh na talmhainn, agus bha an Fhèinn fhèin, am buidheann dom buineadh Oisean, bha iadsan a' sabaid an aghaidh nan uilebheistean a bha sin, agus tha tòrr de na dàin agus na sgeulachdan a' dèanamh iomradh air na h-uilebheistean a bhiodh a' tighinn orra, agus an dòigh anns am biodh iad a' sabaid riutha agus gam marbhadh. Agus 's e sin an saoghal a bh' ann. Saoghal seann draoidheachd, saoghal seann diadhachd, ach cuideachd saoghal aig an robh seòrsa de bhuinteanas ris an linn a bh' ann. Tha mi a' smaoineachadh gu bheil e gu math bunaiteach do mhac an duine, 's do nighean an duine cuideachd, a bhith a' dol air ais gu àm mar sin, àm ròlaisteach, nuair a bha diofar dreach air an t-saoghal seach mar a tha e an-diugh.

CM: Agus tha sin cha mhòr ga mo thoirt gu sgeulachd na seachdain a chaidh, a bhith a' beachdachadh air Beinn Chruachain a bhith ann an cumadh Oisein, a tha sinn a' cluinntinn 's dòcha nach robh idir ann anns an t-seagh sin, duine a' dol a dhèanamh a dhealbh fhèin dheth, agus 's dòcha ann am mìle bliadhna gum biodh daoine a' coimhead air ais: 'Ò uill, 's e ròlaist a bh' anns a h-uile càil a bha sin gu dearbha.'

DM: Seadh, 's bidh na ròlaistean aca fhèin aca cuideachd, a bheil fhios agad. Tha sin a' tachairt anns gach linn. Agus tha e gu math inntinneach an-dràsta gu bheil daoine airson dealbh a dhèanamh de dh'Oisean. Tha e mar gum b' eadh an saoghal againne, tha e cho cruaidh 's cho làn de... mar a bha an duine a bha a' bruidhinn ag ràdh, parameters agus interfaces 's rudan mar sin, airson dol air ais gu linn a bha na bu shaorsainneil 's a bha na bu bhòidhche, agus gu ìre tha mi a' smaointeachadh gu bheil Oisean a' riochdachadh na linne sin dhuinn.

CM: Agus tha e inntinneach cuideachd gu bheil rud mar seo a' toirt oirnn a bhith a' dèanamh an seòrsa còmhraidh a th' againn ann an seo an-diugh, oir 's e an suidheachadh a th' ann, nach e, tha a' chuid-mhòr againn air am facal Oisean a chluinntinn, ach a' mhòr-chuid againn, chan eil dad a dh'fhios againn dè a' chiall a th' aige.

DM: Chan eil.

CM: Ach dìreach corra dhuine mar thu fhèin a tha... tha sin mar phàirt dhen ùidh a th' agad co-cheangailte ri bhith na do sgoilear. Ach a' mhòr-chuid againn, chan eil fhios againn dad mu dheidhinn seo an-diugh. Tha sinn air a chall, nach eil?

DM: Tha. Agus 's e an rud a bha a' cur iongnadh orm nuair a bha mi a' beachdachadh air seo, tha fhios agamsa dè tha am facal Oisín a' ciallachadh. Tha e a' ciallachadh meann beag, minnean, fiadh beag, fhios agad. Sin a bha e a' ciallachadh nuair a chaidh a chruthachadh, 's dòcha, am facal fhèin. Ach an-diugh, tha e a' ciallachadh tòrr a rudan ròlaisteach - romantic, mar a their iad - agus tha e a' toirt dealbh nad inntinn air seann làithean nuair a bha a' ghrian a' dol sìos air taobh siar Eilean Leòdhais ann an dòigh nach eil i eadhon an-diugh.

CM: Ò, no fiù 's Tiriodh fhèin.

DM: Seadh, dìreach.

CM: Ò uill, carson a tha sinn a' dol a mhilleadh deagh sgeulachd le cus dhen an fhìrinn a chur innte, a-rèiste. Agus sin rudeigin eile a bh' ann cuideachd. Nise, cha tuirt mi facal mu Sheumas Mac a' Phearsain idir, 's chan eil mi a' dol a ràdh facal mu dheidhinn an-diugh. Bheireadh sin air raon eile sinn. 'S dòcha gun till sinn gun a sin latha air choreigin eile. Agus tha mi a' creidse gu bheil gu leòr ag èisteachd 's gu bheil iad ag ràdh riutha fhèin, 'Cò th' ann an Seumas Mac a' Phearsain?' Ach fàgaidh sinn sin gu latha eile. Ma thòisicheas sinn air sin, cha b' e an-diugh an latha a chuireas sinn crìoch air. A Dhòmhnaill, ceud mìle taing dhuibhse airson a bhith dìreach a' cur beagan feòil air cnàmhan Oisein dhuinn ann an seo an-diugh. Tapadh leibhse gu dearbha.

DM: Mòran taing dhuit fhèin, a Choinnich, cuideachd.

CM: An t-Ollamh Dòmhnall Meek ann an sin, ann an Obar Dheathain.

Cruth Inneal a' Chlàir

Dat

Càileachd an Fhuaime

Math