Prògram Choinnich

Coinneach MacÌomhair (CM): Bha latha mòr aca ann an Loch nam Madadh an Uibhist a Tuath Dihaoine a chaidh. Chaidh trì goireasan am fosgladh a thathas an dòchas a chuireas ri ìomhaigh a' bhaile, do mhuinntir an àite fhèin agus do luchd-tadhail. Tha Tormod MacIain air an loidhne còmhla riumsa à Loch nam Madadh an-dràsta airson innse dhomh dìreach dè bha a' dol ann an sin Dihaoine. Ciamar a tha thu, a Thormoid?

Tormod MacIain (TM): Tha mi gu math, a Choinnich.

CM: Uill, dè na trì goireasan a chaidh am fosgladh?

TM: Uill, a' chiad àite, 's e seòrsa de raon-cluich beag dhan chloinn, agus tha a h-uile seòrsa inneal an seo a chumadh air an... air an dòigh iad, airson cluich, agus 's e a' chlann fhèin a dh'fhosgail e, clann na sgoile, agus bha muinntir an àite timcheall air. Agus an dàrna h-àite, 's e leasachadh leis an laimrig, leis a' chidhe bheag ann an Loch nam Madadh, far am bi iasgairean ag obair agus daoine eile a bhios a' seòladh. 'S an treas àite, uill, an oir a' chladaich ri taobh Taigh Chearsabhagh, far a bheil taigh-tasgaidh againn agus ionad-ealain an-dràsta, agus chaidh leasachadh a dhèanamh ann a shin airson daoine a bhios a' seòladh agus a' coimhead timcheall.

CM: Uill, annasach a h-uile càil a tha seo a bhith a' tachairt air an aon latha ann an Loch nam Madadh, nach robh?

TM: Tha. Tha e uabhasach annasach, agus tha mi a' smaoineachadh gu bheil fhios aig na daoine cho fortanach 's a tha iad, agus tha e a' toirt togail dhan bhaile cuideachd.

CM: Uill tha, agus bha gu leòr 's bha iad a' faireachdainn gun robh feum aig a' bhaile air beagan togail, nach robh?

TM: Bha. Tha mi a' smaoineachadh gun robh daoine a' smaoineachadh gun robh... gun robh am baile air obraichean a chall bho chionn bhliadhnaichean, agus tha e... tha e air an cridhe a thogail, tha mi a' smaoineachadh, gun do thachair seo.

CM: Uill, gu dearbha, tha e sgoinneil an t-àite sin a bhith aig a' chloinn airson a bhith a' cluich ann gu dearbha. A bheil iad air tòiseachadh air cluich ann mar-thà?

TM: Ò, tha iad... tha iad ann mar-thà. Tha.

CM: Nise, nuair a bha thu ag ràdh laimrig an sin, cò bhios ga cleachdadh?

TM: Uill, bidh duine sam bith a bhios... uill, duine sam bith a bhios airson eathar a chur dhan t-sàl, agus... uill, bidh na h-iasgairean a' dèanamh sin o àm gu àm, agus tha tòrr de dh'eathraichean faisg air. Niste, fhios a'd, ged a tha i... ged a tha an leasachadh mòr a tha seo, an rud a chaidh fhosgladh Dihaoine, chan eil seo ach a' chiad cheum. Tha dà cheum eile ann fhathast, nuair a... nuair a bhios an t-airgead air a chruinneachadh, airson leasachadh nas motha a dhèanamh air a' chidhe a tha seo. Cha robh seo ach a' chiad cheum. Agus... uill, duine sam bith a bhios a' seòladh no... no a' cur inflatables dhan uisge gu h-àraid.

CM: Mar sin dheth, 's e leasachadh cidhe a th' ann airson cur-seachad. Chan e cho mòr leasachadh cidhe airson iasgach mar a bh' ann aig aon àm, an e?

TM: Uill, tha mi a' creidsinn gum bi daoine a bhios ri cur-seachad a' dèanamh barrachd feum dheth, ach bidh e... bidh e feumail dha na h-iasgairean cuideachd.

CM: Dè a-nise mu dheidhinn Taigh Chearsabhaigh? Ionad a tha sin a tha gu dearbha air cliù a chosnadh dha fhèin, agus air... cha mhòr an-diugh na chridhe aig Loch nam Madadh. An leudachadh 's an leasachadh a chaidh a dhèanamh ann an seo, dè feum a nì sin?

TM: Uill, tha e a' cur maise air an àite sa chiad àite, agus tha e... tha e gus... tha e a' dol a bhith feumail airson duine sam bith a tha a' dol dhan taigh-tasgaidh, tha iad a' faicinn gu bheil àite annasach ri thaobh an oir a' chladaich, agus tha seòrsa de starsach a' dol a-null seachad air far am bi na h-eathraichean aig muinntir seòlaidh, agus 's e starsach air a thogail le fiodh, agus tha rud annasach an sin an-dràsta - nuair a choisicheas tu seachad air àite àraid far a bheil sensor, tha ceòl pìobaireachd a' tòiseachadh a' tighinn a-mach fon talamh, agus bàrdachd ga aithris aig an aon àm.

CM: Gu sealladh, nan dèanadh iad sin air duine aig meadhan-oidhche, 's iad a ghabhadh an eagal.

TM: Uill, bha e... bha e rudeigin... bha... chaidh mise sìos am beul na h-oidhche, agus feumaidh mi aideachadh gun robh e annasach.

CM: Cò bha a' cluich a' phìob? Thu fhèin?

TM: Cha mhi. Cha mhi. Cuideigin eile a bh' ann.

CM: Uill, tha sin inntinneach dha-rìribh, agus mo thaing dhut airson a thighinn air a' phrògram an-diugh a dh'innse dhuinn beagan mu dheidhinn, agus tha mi cinnteach gu dearbha gum bi muinntir Loch nam Madadh a' dèanamh toileachas ris a sin, agus an ìomhaigh ùr a tha e a' dol a thoirt, agus cuideachd a' tòiseachadh a' toirt dhan bhaile. Tapadh leatsa, a Thormoid.

TM: 'S e do... 's e ur beatha.

CM: Tormod MacIain ann an sin air an loidhne à Loch nam Madadh.