A' bleith eòrna.

Iain Peatarsan (IP:): Nis a Mhòrag, tha sibh a' dol a dh'innse mun an turas a chaidh sibh a thaigh Uilleim 'ic Alasdair a bhleith an eòrna. Siuthad.

Mòrag NicIllEathain (MN): Uill, bha mi a' dol a dhèanamh min-eòrna, 's chuir mi an gràn dhan an àmhainn 's chruadhaich mi ann a shin e, a-staigh anns an àmhainn.

IP: Agus an gràn a bha seo, an ann agaibh fhèin a bha e?

MN: 'S ann. M' athair a... ga spioladh 's ga...

IP: Seadh. 'S e eòrna a dh'fhàs dha ur n-athair am Borgh a bh' ann?

MN: Seadh anns an [???].

IP: Seadh. Seadh dìreach. Seadh. Chuir sibh a-nise dhan an àmhainn e. Bha sibh... spioladh sibh an toiseach e, agus an uair sin an dèidh a spioladh, chuir sibh dhan àmhainn e, an e a bha sibh a' ràdh?

MN: Uill, bha... dh'fheuchadh tu ri... ri... fhios agad, bha thu ga spioladh far an sguaib 's...

IP: Seadh. Far nan dias.

MN: Sheadh. Far nan dias, ma-thà agus... Bha, fhios agad, bha leithid a rud air, agus... dh'fheumadh tu a chur air mar sin. Ach rinn mi co-dhiù cho math e 's a b' urrainn mi, 's dh'fhalbh mi leis a thaigh Uilleim mhic Alasdair ann am peile, agus bha a' bhrà deiseil air mo choinneimh. 'S cha robh ach mi an uair sin a' cur grùgan sìos ann a shin 's ga... 's abair thusa gun robh e sgìth. Thàinig mise dhachaigh le làn - uill cha robh e làn, am peile - leis a' mhin.

IP: Seadh.

MN: Agus sin agad a' chuid...

Catrìona Pheatarsan (CP): 'S dè rinn thu ris a' mhin an uair sin?

IP: An do rinn sibh lite-eòrna no...?

MN: Sheadh. Lite-eòrna 's aran.

IP: Seadh dìreach.

MN: Ach 's e lite a b' fheàrr le m' athair. 'S e lite a b' fheàrr le mo mhàthair.

CP: 'S am biodh sibh a' dèanamh na lite-eòrna mar gum biodh sibh a' dèanamh lite-chorca?

MN: Sheadh. Rud beag salainn innte 's... Ò, truinnsear lite-eòrna 's bainne, 's tha mise a' ràdh riut...

IP: Bha e math.

MN: Ò dha-rìribh.

[Stad sa chlàradh an seo.]

IP: Thèid sinn air ais fhathast chun a seo. Bha an t-eòrna a' fàs dha ur n-athair am Borgh. Bhathar a-nise a' buain an eòrna 's ga... a h-uile sìon mar a bhithear a' dèanamh ri arbhar co-dhiù. Agus a-nise, nuair a bha an t-eòrna sin a' tighinn dhachaigh, ciamar a bhathar ga obrachadh an toiseach?

MN: Bha uaireannan m' athair a' dol dhan a' bhàthaich 's a' faighinn nan sguaban. Saoilidh mi fhathast gu bheil mi ga fhaicinn a' toir a h-uile dias dheth. Nuair a-nis a dh'iarradh e cuid mhath ann an tubaidh, bha e an uair sin a' [?faighinn] na spaid, 's bhiodh e [???] 's bha sin a' toir a' chalg dheth. Agus cha robh agad an uair sin ach tòiseachadh air a chur ann an criathar 's a rudanachadh.

IP: A chriathradh.

MN: A chriathradh.

CP: Dh'fhalbhadh a' chalg...

MN: Sheadh. Dh'fhalbhadh a' chalg.

IP: Bha an uair sin, bha an gràn ceart agaibh. Bha sibh an uair sin ga chruadhachadh, an robh?

MN: Bha.

IP: Agus tha... nise... bha àmhainn agaibhse, bha sibh a ràdh, ach ciamar a-nis a bhiodh iad anns a' chumantas a' cruadhachadh a' ghràin a bha sin? An e sgiathag a chanadh iad?

MN: 'S e. Chunnaic... tha cuimhn' agam air sgiathag a bhith an taigh Uilleim 'ic Alasdair.

IP: Seadh.

MN: Mar sin 's...

CP: 'S dè ris an robh an sgiathag coltach?

MN: Tha, rud cruinn ma-thà. Maide cruinn 's tha... what do you call it... [?càth] eòrna mar sin ga chrochadh.

CP: An ann os cinn an teine?

MN: Sheadh. Os cinn an teine.

CP: Os cinn an teine. Air an t-slabhraidh?

MN: Sheadh.

IP: Seadh. Agus a-nis, an e cracann a bh' anns an sgiathaig a bha seo?

CP: Frèam fiodha, an e?

MN: Frèam fiodha.

IP: Frèam fiodha. Ach dè...?

MN: Cha chreid mi nach biodh... Cha chreid mi nach biodh iad a' cur... what do you call it? Ga... Cur an rud gu h-ìseal ann a shin airson nach deigheadh an gràn roimhe.

IP: Seadh.

MN: 'S nuair a gheibheadh tu sin ceart, bha thu an uair sin... bha thu a' falbh dhachaigh leis.

CP: 'S dè cho fad 's a dh'fheumadh an gràn a-nist a bhith anns an àmhainn agaibh?

MN: Och dh'fheumadh e [?dìreach na] thogradh tu.

CP: Gu 'm biodh e cho tioram...

MN: Sheadh.

CP: Ò bha a' chalg a-nis... Dh'fheumadh a' chalg tighinn dheth an uair sin, an fheumadh?

IP: Ò bha a' chalg air... Ach an rud a bha a-muigh, an t-slige chruaidh a bha timcheall air.

CP: Càth. Dè th' anns a' chàth?

MN: Sin agad e, càth. Ò Thighearna coimhead an uair a tha e. Cha leig an t-eagal dhòmhsa dhol a-staigh a-nochd.

CP: Èist!