A Nìghneag a’ Chùil Duinn, Nach Fhan Thu?

A nìghneag a' chùil duinn, nach fhan thu?
Fios san tìr gur mi do leannan,
A nìghneag a' chùil duinn, nach fhan thu?

Nìghneag a' chùil bhuidhe bhòidheach,
Bha mi 'n tòir ort o chionn tamail.

A nìghneag...

Nìghneag a' chùil bhuidhe stèidht'
Às do dhèidh cha bhi mi maireann.

A nìghneag...

Tha do phòg leam mar an siùcar
'S àileadh nan ùbhlan far d' anail.

A nìghneag...

'S nan gealladh tu mo phòsadh
Chuirinn beòir dut ann an glainne.

A nìghneag...

'S chuirinn fàinne mu do mheòir
'S dìthein-òir os chionn do mhala.

A nìghneag...