An Rionnach Beag 's an Rionnach Mòr

Shìos anns an fheamainn, shìos fon a' mhuir
Rudeigin a' gluasad, saoil dè tha siud?
Rionnach mòr reamhar agus rionnach beag
Tiugainn gus an cluinn sinn an còmhradh a th' ac'.

"Dè tha mi faicinn", thuirt an rionnach beag,
"Thall an siud ri taobh a' chreig"
"Seachain e gu faic sinn," thuirt an rionnach mòr,
"Gun fhios nach eil dubhan ann a ghlacas sinn beò."

"Tha mise leis an acras," thuirt an rionnach beag,
"Tha mi dol ga ithe suas ann an diog."
"Cuimhnich air do sheanair," thuirt an rionnach mòr
"Mar a dh'ith e dubhan is cha chuala sinn an còrr."

Cha do dh'èist an rionnach beag ris an rionnach mòr
'S tha e nis air truinnsear na laighe air a' bhòrd.