Bràigh Rùsgaich
Lyrics:
Ged is socrach mo leabaidh
Chan e 'n cadal tha shùrd orm.
B' anns' bhith suaint' ann am breacan
Ann an glacaigean Rùsgaich.
Sèist
Horo hù bhinn ho rò
Hò ro hù bhinn ò
Horo bhi, horo bhi
Horo hù bhinn ho rò.
Far am minig a bha mi
Iomadh là air bheag cùram.
'S bhiodh mo ghunna fom achlais
Cumail fasgadh bhon driùchd oirr'.
'S air thruimead na fraise
'S i gun lasadh am fùdar.
'S cha b' e glagraich na sràidean
A b' àbhaist mo dhùsgadh.
'S cha b' e clag nan còig uairean
A bhiodh nam chluasan a' dùsgadh.
Ach an ceilear bu bhòidhche
Bh' aig na h-eòin am Bràigh Rùsgaich.
Bhiodh a' chuthag air chreagan,
'S i toirt freagairt don smùdan.
'S bhiodh an smeòrach gu h-àrd ann
'S i air bhàrr nam bad dù'-ghorm.
Agus Robin gu h-ìosal
Ann an iochdar nan dlù-phreas.
Anns na meanganan bòidheach
'S damh na cròice gan rùsgadh.
Nuair thig oidhch' Fhèill an Ròid oirnn
Leam bu bhòidheach a bhùilich.
Cha b' e fàileadh nan cladhan
A gheibhte 'n doire mo rùin-sa.
Ach trom fhàileadh na meala
Dheth na meanganan ùra.
'S cò is urrainn a ràidhte
Nach bi mi fhathast an Rùsgaich.