Saighdeir Chaluim Bhàin
Lyrics:
Hè horaibh ì, hoirinn hoirinn
Hè horaibh ì, hoirinn àil
Hè horaibh ì, och is èileadh
Leamsa b' èibhinn fhaicinn slàn.
Chuir iad thu air tìr an Èirinn
B' aotram bha do cheum air sràid;
Chuir iad umad deise an t-saighdear
Bu tu an diaman am measg chàich.
O gur mise tha gu cianail
'S mi ri faicinn feur a' fàs,
'S e ri falach orm do lorgan
'S mi gu sgealbadh leis a' ghràdh.
Nuair a thèid mi dhan a' mhòine
Bidh na deòir a' ruith gu làr;
Ach ged a lìonadh iad mo bhrògan
Cha leig mi mo bhròn ri càch.
Ged a thigeadh triùir san oidhche
'S mi nach tugadh dhaibh mo làmh;
'S mi nach tugadh dhaibh an coibhneas
Gheibheadh Saighdear Chaluim Bhàin.
Ged a thigeadh tràigh nach fhacas
Riamh a leithid anns an àit';
'S iomadh struthan den a' chuan
Tha eadar mi 's mo luaidh, nach tràigh.
Cait' am bheil thu, ghràidh, an tig thu
'M bheil thu 'n dùil an tig thu, ghràidh?
An tig thu shealltainn orm am bliadhna
Na 'n tig thu gu sìorraidh bràth?
Nuair a thèid mi dhan an doras
'S a chì mi ghealach 's i na h-àird
Bidh mo smuaintean air an t-saighdear
Dh'fhalbh na fhèileadh dhan a' bhlàr.
Chunnaic mise thu as mo chadal
Ri tighinn dhachaigh as a' bhlàr
Le do chlaidheamh caol a' lasadh
Cha b' ann gam iarraidh-sa a bha.